Plus de photos

Zeréck am LN fir de Cinquantenaire

Den 29. Mäerz war de Bob Schroeder, e fréiere Schüler aus dem Wëlzer Lycée (Promotioun 2003), op Besuch am LN, fir eng Konferenz iwwer seng Studien a Recherchen an der Chimie vun de Polymeren ze halen ...

Dem Bob seng Biographie liesen (pdf)

... Fir d’éischt huet hien en Abléck a säi spannende Parcours ginn, deen hien op Bréissel, London, an Amerika an nees zeréck op London geféiert huet. Dunn ass et awer ëm d’Polymere gaangen, déi ënner gewëssene Konditioune kënne Stroum leeden. Dëst erméiglecht ganz nei a spezifesch Uwendungen. Et ergi sech zum Beispill nei Méiglechkeeten an der Photovoltaik, duerch flexibel Solarzellen oder och nach organesch Sensoren, déi bestëmmte Parameteren am Kierper kéinte moossen, ouni datt de Patient do misst Apparature mat sech droen. Doriwwer eraus sinn och am Beräich vun de Prothese grouss Fortschrëtter méiglech.

Am Moment leet de Bob Schroeder e Labo am „University College London“ a lieft och mat senger Famill zu London.

No der Konferenz ass et e Patt zum Beschte ginn, bei deem sech eng ganz Rëtsch „Ancienen“ aus dem Lycée du Nord konnten erëmgesinn a mateneen iwwer déi al Zäite poteren.

Dëst war eng éischt Konferenz am Kader vun de Festivitéite vum 50. Gebuertsdag vum Lycée du Nord.

De 27. Juni kënnt dann d‘Catherine Scheer eng Konferenz am Beräich vun der Ethnologie am südostasiatesche Raum halen.

Eng gréisser Gebuertsdagsfeier vum Lycée ass fir de 15. Juni virgesinn.
Deen Dag ka jiiddereen, vu 17 Auer un, un enger „Balade à travers le temps“ deelhuelen oder sech op d’Concerte freeën, déi um 18 Auer uginn. De groussen Highlight vun deem Owend wäert awer fir ganz vill Leit de Bal mat „Why Not” sinn, deen um 21 Auer lassgeet.